Christine Beerli
Rächtsanwältin, Ex-Ständerätin. Vizpräsidäntin vom IKRK.
"Nach Aasicht vo de Medie – i der dütsche u o i der französischsprachige Schwyz – isch Biel im Rating vor Läbesqualität töif aagsidlet. Vil z vil Verchehr (Outo u Droge ...) un e höchi Kriminalitätsrate ...
Es isch aber erstuunlech, dass sech usgrächnet d Bielerinne u Bieler i ihrer Stadt wohl u deheime füele. Wär echly lenger dablybt, sech Zyt laat u Vorurteile uf d Syte schiebt, entdeckt gly einisch der Charme vo dere zwöisprachige Stadt. Bilingue z sy isch e Teil vor Identität vo Biel, nämlech e Mischig us Kulture, wo ds Läbe i dere Stadt so interessant u sprützig macht.
Als Dütschschwyzere, wo vil Sympathie u Verbindige zur französischsprachige Schwyz het, plädieren i drum für d Pfleg vo der französische Sprach u d Förderig vor Zwöisprachigkeit – o i de Schuele. Es isch e Riisechance, imene kulturell so läbige Umfäld dörfe z läbe – packe mer se u mache druus e blüejendi Stadt!"
-
Ch. Beerli
D Rächtsanwältin Christine Beerli, gebore 1953, het ihri politischi Karriere 1980 im Stadtrat vo Biel aagfange. Vo 1986 bis 1991 isch si Mitglid vom Grosse Rat vom Kt. Bärn gsi u nächär bis 2003 Ständerätin. Si het d Stiftig Science et Cité vo 2004 bis 2009 präsidiert u isch Präsidäntin vo Swissmedic, der schwyzerische Zuelassigs- u Ufsichtsbehörde für Heilmittel. Im Januar 2008 isch si zur permanänte Vizepräsidäntin vom Internationale Komitee vom Rote Chrüz ernennt worde. I dere Position isch si Mitglid vom Vorstand vom IKRK, vom oberschte Organ vo dere Institution, u o vo der Ratsversammlig u der Präsidäntschaft.
