Dominique de Buman
Fryburger Nationalrat, Vizepräsidänt vo der CVP Schwyz u Präsidänt vo der Stiftig Bibliomedia.
Ds Buech isch en Ort, wo me sech ustuuscht, e Träffpunkt zwüsche Wälte, zwüsche gedankleche u ertröimte Universe, wo sech süsch chuum je würde begägne u sech gägesytig chönnte berychere - über d Gränze vo Zyte u Kontinänte ewägg. Dä Ustuusch vo Gedanke, Meinige u Blickwinkle macht ACEL uus. Hoffetlech wärde üsi Studie ds Buech als wärtvolls Ustuuschmittel fördere.
-
Der Dominique de Buman zoberscht ufem Turm vo der Kathedrale Sankt Nikolaus z Fryburg, vo wo uus me di gröschti Altstadt vor Schwyz mit ihrne Quartier Burg, Au u Nöjestadt cha bewundere.
Der Dominique de Buman, gebore 1956 z Freiburg, het 1975 di Eidgenössischi Matur (Latynisch–Griechisch) im Collège Saint-Michel gmacht. 1980 het er a der Universität vo syre Heimatstadt mit em Lizenziat i Rächt abgschlosse. Er isch vo 1986 bis 2003 Abgeordnete vom Grosse Rat vom Kanton Freiburg gsi u het ds Kantonsparlamänt 2001 präsidiert. 1986 isch er i Gemeindrat vo der Stadt Freiburg yträtte u vo 1994 bis 2004 Stadtpräsidänt gsi. Ändi 1996 het er d Widerstandsbewegig zur Rettig vo der Brasserie Cardinal initiiert. 2003 isch er i Nationalrat gwählt worde. Er isch Vizepräsidänt vo der Christlechdemokratische Volkspartei vo der Schwyz. Als Mitglid vo der Kommission für Wirtschaft u Abgabe vom Nationalrat het er di parlamentarischi Initiative, wo vom verstorbnige Jean-Philippe Maître lanciert worden isch u wo feschti Buechpryse verlangt, wider ufgno. Er präsidiert o der Stiftigsrat Bibliomedia u verschideni wyteri Vereinigunge.
