Der Stil syg der Mönsch, seit me. D Verbundeheit mit der französische Sprach u ihrer Literatur isch nid nume öppis Intellektuells, es het mit Liebi z tüe. Das verpflichtet eim zur Eleganz u sich sälber z achte. Nid gnue; mit der französische Sprach e Bindig yzgah heisst o, ds Analysiere u d Gnauigkeit bim Usdrücke vomene strukturierte Gedanke z übernäh. Ds intime Verhältnis, wo me zu syre Sprach het, bedingt also o, dass me syni geischtige Fähigkeite voll entwicklet. Wär di französischi Sprach gärn het u ihri Wärte vertritt, isch öpper, wo würklech handlet, wo ne Dialog zwüsche Kulturen ermüglechet, e Mönsch, wo innerlech mitmacht u bereit isch zu ächte Begägnige zwüsche Völker: d Hoffnig uf ene fridlechi Wält i ihrer ganze Vielfalt.

Der Jacques-Simon Eggly isch 1924 z Genf gebore u het a der Rächtswüsseschaftleche Fakultät vo der Universität Genf u am Institut HEI gstudiert. I d Politik u i Journalismus yträtte isch er dür sy Mitarbeit i der Commission confédérée de bons offices pour le Jura, wo nach ihrem Präsident o Commission Petitpierre heisst. Als Mitglid vom Grosse Rat vo Genf vo 1977 bis 1983 isch er am 28. Novämber 1983 zum Nationalrat gwählt worde, wo ner bis zum 2. Dezämber 2007 Ysitz gno het. Er het di Liberali Partei vo der Schwyz vo 1997 bis 2002 präsidiert. Vo 1969 bis 1998 het er bim Journal de Genève Leitartikle gschribe u isch als Korrespondänt tätig gsi. Hütt isch er Korrespondänt by der schwyzerische Tageszytig Le Temps u Gschichtslehrer a der Ecole Moser u leitet es Seminar für e Master i Journalismus a der Universität Genf. Er präsidiert unter anderem d Uslandschwyzer-Organisation (ASO) u der Verein „Hellas et Roma“.