Der Emmanuel Dongala, Schriftsteller us em Kongo-Brazzaville, gebore 1941, macht der Master i Wüsseschaft in den USA u überchunt nächär der Doktertitel i organischer Chemie z Frankrych, won er 1973 Un fusil dans la main, un poème dans la poche veröffentlecht. 1977 geit er zrügg i sy Heimat, für Schuel z gä. Er gründet dört Le Théâtre de l’Eclair u publiziert e Band Erzählige, Jazz et vin de palme, un e Roman, Le Feu des origines (Grand Prix littéraire de l’Afrique Noire 1988). Wo 1997 der Bürgerchrieg usbricht, mues er sech entschliesse, i ds Exil z gah. Er läbt mit syre Familie syt 1998 i den USA. Hütt isch er Profässer für Chemie u frankophoni Literatur am Bard College z Simon’s Rock. Vo sym amerikanischen Exil uus bhaltet er ds politische u historische Gedächtnis vom Kongo dür ds Drüberschrybe wach, voll Humor u psychologischer Intensität; d Froue hei drin e privilegierte Platz. Syni innovative, luzide Wärch, wo sech i di grosse historische Bewegige yfüege, wo für Afrika typisch sy, schöpfe ihri Originalität us syre wüsseschaftleche Kompetänz u o us sym Inträsse für e bedrohti Humanität. Mit syne beide letschte Romän, Johnny chien méchant u Photo de groupe au bord du fleuve het er sech e Name i der französischsprachige Literatur gmacht.