2003

Als Folg vo verschidnige Mandat im Zämehang mit der Frankophonie, der Interkulturalität u de Literature i französischer Sprach chunt der Patrick Amstutz uf d Idee, e Sammlig vo nöje literarische Studie z gründe, wo näb de wüsseschaftleche Aaforderige Wärt leit uf ne besseri Verständlechkeit u Offeheit us verschidnige, müglechscht läbige Blickwinkle. Er chnüpft die erschte Kontakte u schaffet ds Konzept vo sore Sammlig uus, won er „Le cippe“ touft.

2004

Mit em Ziil, en unabhängige Herusgäberverein z gründe, wo nes settigs Projekt chönnt mittrage, trifft der Patrick Amstutz verschidnigi Persönlechkeite us diverse Wüssensgebiet, wo alli mit der Frankophonie äng verbunde sy u ne bsundrigi Beziehig zur gschribnige Sprach u zur Literatur hei. Der Dominique de Buman, der Thierry Gachet, der Daniel Maggetti, der Pascal Crittin, der Jacques-Simon Eggly, d Marie-José Béguelin u der Thierry Béguin lö sech nadisna für das Projekt begeischtere, u am 20. November 2004 findet d Gründigsversammlig statt. Di einzelne Bänd vo der Sammlig wärde im Verlag Zoé veröffentlecht.

2005

Am 17. März stellt der Patrick Amstutz ds Projekt der Conférence des Délégués aux affaires culturelles (CDAC) vo de sibe wälsche Kantön vor. Am 2. Juni beschliesst d CDAC, das Projekt vom ACEL der Conférence intercantonale de l’instruction publique de la Suisse romande et du Tessin (CIIP) z empfäle.

2006

Mit de verschidnige Parteie wird e vertragleche Rahme usgschaffet u di erschte Verträg mit den Outore wärde unterzeichnet.

2007

Konzept Umschlag u Gstaltig.

Di erschte zwöi Büecher erschyne am 3. September.

2008

Vier nöji Büecher chömen im Oktober use.

Ufschaltig vor Website vo ACEL www.lecippe.ch

2009

Wächsel a der Präsidiumsspitze. Nöji strategischi Überlegige.

Im Ouguscht het der Charles Forsdick, Profässer vor Universität Liverpool, z Biel e zwöisprachige Vortrag mit Bilder zum Thema „Ella Maillard im Land der Uighuren“ gha.

2010

ACEL übergit vo jitz aa d Publikation vo syne Wärch em Waadtländer Verlag Infolio éditions.

Nöji grafischi Charta.

Zum 80. Geburtstag vom Alexandre Voisard het der Arnaud Buchs z Pruntrut en öffentleche Vortrag über di komplexi Lyrik vom jurassische Dichter am Byspil vo Le Déjeu bbotte.

2011

Für d Publikation vo de beide erschte Bänd vor Nöiusgab vom Gsamtwärch vom Charles-Albert Cingria z fyre, het ACEL glychzytig e Le cippe-Band Florides helvètes un e zwöite Band, Cippe à Charles-Albert Cingria, usserhalb vor Serie mit Würdigunge vom Dichter useggä.

D Buechvernissage vo däm Cingria-Diptychon het am 6. Dezämber mit musikalischer Umrahmig zäme mit der Burgergmeind vor Stadt Fryburg im Salon Vicarino de l’Aigle Noir stattgfunde.

2012

Zum hundertschte Geburtstag vor S. Corinna Bille het ACEL parallel e Le Cippe-Band Théoda un e wytere Band, Cippe à Corinna Bille, usserhalb vor Serie mit Würdigunge vo dere Dichtere i Wort u Bild useggä.

D Buechvernissage vo däm Diptychon het am 17. Dezämber i Zämenarbeit mit der Stiftig vo der Abtei im Schloss Mercier z Siders stattgfunde mitere Läsig u musikalischer Umrahmig, darbbotte vor Anne Salamin, vor Rita Gay, vom Jacques Maïtre u vom Olivier Forel.

2013

Übersetzig vo Moravagine vom Blaise Cendrars i di dütschi Sprach.

2014

Vorbereitig vom Fescht 10 Jahr ACEL.

2015

Fescht zum 10-Jahres-Jubiläum vo ACEL am 28. Februar mit ere Vernissage vom Buech Cippe à Bienne (Dans les pas de Walser…).Vorbereitig vom Jubiläum Francis Giauque.

2016

Konzärt zum Jubiläum Francis Giauque am 20. Ouguscht mit em Gabby Marchand.