Daniel Maggetti
Profässer a der Universität Lausanne, Diräkter vom Centre de recherches en littérature romande vo der Universität Lausanne.
I mynen Ougen bruucht’s di Sammlig, wil si genau däm entspricht, wo für mii zellt u was mi bi myre literarische u wüsseschaftleche Tätigkeit aatrybt: dür ds Schrybe, dür ds Kommentiere, dür ds Veröffentleche e Zuegang z schaffe zum eigetleche Chärn (dür kes anders Wort ersetzbar) vo däm, was der Sinn vom literarische Gspräch usmacht. D Lydeschaft für ds Buech als spezifisches Transportmittel für en Ustuusch mit der Wält – u mit üüs sälber – wyterzgä.
-
Der Daniel Maggetti am 2. Juli 2008 i sym Büro im Centre de recherches sur les lettres romandes, wo ner a der Faculté des Lettres vo der Universität Lausanne (Sitz z Dorigny) leitet.
Der Daniel Maggetti, 1961 im Tessin gebore, het vo 1980 bis 1985 a der Universität Lausanne Literaturwüsseschaft gstudiert. Vo 1986 bis 1992 isch er Assischtänt a der Universität Zürich gsi u het i dere Zyt a syre Dissertation mit em Titel L’Invention de la littérature romande (1830–1910) gschribe, wo 1995 by der Editions Payot z Lausanne veröffentlecht worden isch. Nächär het er by verschidnige Forschigsprojekt mitgwürkt u ds Redaktionssekretariat vo der nöje Histoire de la littérature en Suisse romande under der Leitig vom Roger Francillon gfüert. Vo 1996 bis 2003 isch er Dozänt für Literatur vo der Romandie a der Universität Lausanne gsi; syt 1999 schaffet er am Projekt vore kritischen Wärchusgab vom C.F. Ramuz mit, wo ner gägewärtig zäme mit em Roger Francillon leitet. 2003 isch er zum ordentleche Profässer für littérature romande et francophone z Lausanne ernennt worde. Näb syre wüsseschaftleche Tätigkeit isch der Daniel Maggetti o no Autor vo literarische Publikatione.
