Nicolas Bouvier

Der Nicolas Bouvier (1929-1998), Schriftsteller mit „Schuesolen us Luft“, isch sys Läbe lang uf der Suechi nach der Vilfalt vor Wält desumegreist. Er laat üs i syne Wärch Länder la entdecke, won är, wo d Langsamkeit u d Begägnig gärn het, en anderi Klangfülli wahr gno het als die im Okzident. Syt sym erschte Buech, L’Usage du monde (Die Erfahrung der Welt), 1963 veröffentlecht, wo ner sy Initialreis vo Genf uf Afghanistan beschrybt, het ers i allne syne Tägschte druf aagleit, d Bsunderheit vo jedem Ort z erfasse. Ohni je ds Reise z idealisiere, zeigt er üs o di dunkli Syte dervo, wi in Le Poisson-Scorpion (Der Skorpionsfisch) (1981), wo dä, wo reist, sech mit der Müglechkeit vo sym eigete Verschwinde mues usenand setze. Vo Japan bis zu den Aran-Insle füert der Nicolas Bouvier e Dialog mit de verschidnige Kulture, wo ner probiert z verstah, ohni üs je drüber „Wahrheite“ wölle ufzdränge. Di Konfrontation mit em Frömde het ihm ermüglechet, es Wärch z schaffe, won er dermit ds Genre Reiseliteratur ernöjeret het.